mardi 18 décembre 2012

الحاج موسى ، موسى الحاج

-يا حاج بربي يا حاج سامحني ، حبيت نسألك !! ميسالش ؟؟ 
- إي تفضل بنتي باش نجم نعاونك ؟ 
- قلي عيشك ياخي اللحية و النقاب فرض ولا سنة ؟ 
- عجب يا بنتي كفه تسال أكيد فرض 
- واللبسة الكحلة فرض ولا سنة ؟؟ 
- فرض بنتي ، هذيك سترة المرا العفيفة
- عليه اللون الأكحل يا حاج ، ساعة  هو حزين وبارد
- استغفر مولاك هذاك ربي وصى عليه
-  أما عمي الحاج إن علموني إلي ربي مزيان ، احب الألوان الزاهية ، ربي احب الزهو والفرح 
يا حاج انا علموني إلي ربي احب الموسيقى و الضحك و النوار و الورد .
يا حاج أنا علموني إلي ربي خلاص لعباد مزينين بش اضاو الدنيا ، خلاص المرا مزيانة بش تبدى تشطح تحت المطر و يتبل شعرها يلصق على بدنها ازيد ازينها
يا حاج أنا قالولي من صغري إلي الدنيا للفرحان ، للعصافير ، مو احنا زادة عصافير ، كيف نكبرو نجنحوا ، نطيرو و نزينوا السماء !!
السماء الزرقاء إلي حتى في لله ضاوية ، نجومها تلمع تحلها و تخلي العشاق في هبلتهم و في سكرتهم يمدحه !!
السماء الزرقاء إلي تخلي الضايع بالقمرة يعرف ثنتو ، ثنية الحرية إلي تحلى فيها العيشة 
محلاه الليل يا حاج كيف يبدا مع نغمات الموسيقى يعانق في الشوارع !!
الشوارع إلي حيث تكلمت بعد ما سكتت سنين ، قالت الله أكبر و قالت زادة إلي الظلم و الجهل منش قابلين !! 
الشوارع قالت أهههه و قالت على دم الشهيد منش ساكتين !! 
كفه تقلي يا حاج إلي صوت المرا عورة و هي إلي بصوتها كبرت أجيال ، هي إلي بصوتها و صياحها حرت أوطان 
يا حاج ، نسيت عليسة ، نسيت الكهية البربرية ؟؟؟ نسيتهم هذومة الكل ؟؟ ما هم بروحهم و حليبهم جابو الشهيد و الجريح و إلي بدمهم كتبوا على أوراق التاريخ كلمة " لا " و خلو العالم  يشهد واقول إلي الأرض تسقى بعرق الفلاح ودم الجريح و دمع أم الشهيد بكات الليالي أما قالت بصوت العورة إلي ما يغلى على بلدها شي ، حتى ولادها
يا حاج بربي جاوبني !! قلي شنية الحرام : الكذب و الظلم ولا نضال مرا حلمت بالحرية و خذات النضال ثنية !!
هي مزيانة ، ببدنها فرحانة و عمرها ما ختارت الأكحل لون و ما اغطيها كان علم بلادها !!    

Aucun commentaire:

Enregistrer un commentaire