تونس ؟؟ فكروني أنهي تونس ؟؟؟

تونس غنية كيف بش تعطي فلوس للكلاب إلي سودلنا مستقبلنا ... أما تونس فرنكل كيف بش داوي وحدة من وردتها كيفما مرام و تعطها حقها " حق الحياة" 

تونس غنية كيف بش تمول احزاب الهانة و رقود جبانة ... أما تونس فقر للعنكوش كيف بش ترجع حق جرحى ثورة ( منحكوش عالشهداء خاطر دمهم متصيسش بفلوس )

تونس غنية كيف بش تشري غاز وكرطوش بش تخنق وتقتل ولادها ... أما تونس تقريلو ( كيفما اقولو ولاد لحوم)  كيف بش تعطي لزوالي المم

تونس لسانها طويل كيف بش تكفر و تفتي بقتل... أما تونس لسانها يتقص كيف بش تنادي بحق ولدها ودم صغارها ، بحقها إلي اغتصبوه 

تونس مقواه في عينين عملة وخونة .... تونس مسكنة في عينين ولادها تشكي وتبكي غدر زمان ولادها العائقين 

كان اسمو شكري بالعيد

كان اسمو شكري بالعيد

 وتوا ولا اسمو وجيعة  ولا اسمو ثورة

 اسمو تونس ... تونس إلي بدم الشهيد تحيا وتتنفس  .... 

هو وجيعة في قلوب رفاقو, دمعة في عينين بنتو وحسرة في قلب مارتو 

هو روح الشارع .. هو قلب الزوالي ... صوت الجيعان

 هو حكاية التراكن و صوت الحرية ... هو نبض الجامعة

هو حكاية مزيانة .. فرحة بلد .. نهضة شعب  ( متخفوش هو نهضة بالحق ، مش حركة عملة بللعاني )

هو حبيب البسمة و فرحة نيروز و ضحكة ندى  

هو ريحة الياسمين و رطابتو ... هو هبلة البحر و عشقو

هو أصل وفصل ، هو بداية إلي عمرها مايكون عندها نهاية

هو شكري بالعيد  ...............هو تونس