vendredi 21 décembre 2012

résolutions 2013

résolutions 2013
On a demandé à  trois personnes c'est quoi leur résolutions pour 2013 
la Tunisie a répondu :
- je dois dois prendre mon avenir en main , le Qatar m'a détruit 
-je dois prendre du poids , j'ai trop maigris 
-je dois rééduquer mes enfants , ils ne savent pas vivre en communauté 
et je dois me faire une beauté , la Nahdha m'a défiguré 
la Libye ajouta : 
- moi je dois apprendre à courir seule , l'Amérique me ralenti 
-je dois faire du shopping et m'acheter une nouvelle garde robe 
-je dois faire les comptes de mes biens et les liguer à mes petits enfants 
un nouveau départ s'impose !!! 
triste la Syrie nous répondit :
- je dois combattre la maladie qui est en moi 
-je dois fermer mes portes aux visiteurs  qui tuent mes enfants 
-je dois protéger les fidèles qui me restent: la Turquie les a massacré 
-je dois reconstituer la liste de mes amis , beaucoup m'ont trahi
-je dois reprendre des forces , les jihadistes sont entrain de me voler 

mercredi 19 décembre 2012

سيب المظلوم و عاود تعلم القانون !!!


تعلموا الحقوق و نساو روح القانون !! 
نساو إلي الحقوق هي الدفاع على حق المظلوم 
تجروا بحق السجين و باعوا و شراو فيه 
نساو القسم إلي حلفوه نهرت إلي فرحو بتخرجهم
و زيد ميحشموش و اقولك " ياما فالحبس مظاليم "
إي و انتوما وينكم ؟؟؟؛وإلى القانون في ضهرو تطبيق و في باطنو كذب و تلهويت
إحشمو رو اليوم عندكم و غدوة عند غيركم
مش طلعتوا في تلافز و قلت إلي جرب الحبس عمرو ما يدفن ولاد بلادو فيه ؟؟
إي باهي يا سيد ، وينو القانون ، ويني العدالة وينو إستقلال القضاء ؟؟ ولا هذي شعارات مزيانة تجبدهة أيامات الصندوق و تنسوها كيف تشدو لكرسي ؟؟
تي يزيتوشي توا ؟؟!! إحشمو  راي الكراسي كن دامت راي دامت الغيركم !!
اصل ناس بكري " ما احس بالجمرة كان إلي عافس عليها "
انتوما زادة تحرق جلدكم بجمرة الحبس و الظلم و إلى الكراسي فليامات هذي زادة نساتكم ؟؟
اه إي نسيت ، انتوما فالحين كان تزيدوا بها ، تسرقوا بها اليتيم و الشعب المسكين ، إلي عطاكم صوت في نهار مشؤوم و قلكم على الضالين أمين !! 
إحشمو يلي كراسي نساتكم أصلكم !! 
إحشمو راكم عملتو العار ، إحشمو رو الحي اروح و اجيكوم نهار و تتحسبو و ماينفع وقتها لا بكاء  و لا كراسي  
سيب المظلوم و عاود تعلم القانون !!! 

mardi 18 décembre 2012

الحاج موسى ، موسى الحاج

-يا حاج بربي يا حاج سامحني ، حبيت نسألك !! ميسالش ؟؟ 
- إي تفضل بنتي باش نجم نعاونك ؟ 
- قلي عيشك ياخي اللحية و النقاب فرض ولا سنة ؟ 
- عجب يا بنتي كفه تسال أكيد فرض 
- واللبسة الكحلة فرض ولا سنة ؟؟ 
- فرض بنتي ، هذيك سترة المرا العفيفة
- عليه اللون الأكحل يا حاج ، ساعة  هو حزين وبارد
- استغفر مولاك هذاك ربي وصى عليه
-  أما عمي الحاج إن علموني إلي ربي مزيان ، احب الألوان الزاهية ، ربي احب الزهو والفرح 
يا حاج انا علموني إلي ربي احب الموسيقى و الضحك و النوار و الورد .
يا حاج أنا علموني إلي ربي خلاص لعباد مزينين بش اضاو الدنيا ، خلاص المرا مزيانة بش تبدى تشطح تحت المطر و يتبل شعرها يلصق على بدنها ازيد ازينها
يا حاج أنا قالولي من صغري إلي الدنيا للفرحان ، للعصافير ، مو احنا زادة عصافير ، كيف نكبرو نجنحوا ، نطيرو و نزينوا السماء !!
السماء الزرقاء إلي حتى في لله ضاوية ، نجومها تلمع تحلها و تخلي العشاق في هبلتهم و في سكرتهم يمدحه !!
السماء الزرقاء إلي تخلي الضايع بالقمرة يعرف ثنتو ، ثنية الحرية إلي تحلى فيها العيشة 
محلاه الليل يا حاج كيف يبدا مع نغمات الموسيقى يعانق في الشوارع !!
الشوارع إلي حيث تكلمت بعد ما سكتت سنين ، قالت الله أكبر و قالت زادة إلي الظلم و الجهل منش قابلين !! 
الشوارع قالت أهههه و قالت على دم الشهيد منش ساكتين !! 
كفه تقلي يا حاج إلي صوت المرا عورة و هي إلي بصوتها كبرت أجيال ، هي إلي بصوتها و صياحها حرت أوطان 
يا حاج ، نسيت عليسة ، نسيت الكهية البربرية ؟؟؟ نسيتهم هذومة الكل ؟؟ ما هم بروحهم و حليبهم جابو الشهيد و الجريح و إلي بدمهم كتبوا على أوراق التاريخ كلمة " لا " و خلو العالم  يشهد واقول إلي الأرض تسقى بعرق الفلاح ودم الجريح و دمع أم الشهيد بكات الليالي أما قالت بصوت العورة إلي ما يغلى على بلدها شي ، حتى ولادها
يا حاج بربي جاوبني !! قلي شنية الحرام : الكذب و الظلم ولا نضال مرا حلمت بالحرية و خذات النضال ثنية !!
هي مزيانة ، ببدنها فرحانة و عمرها ما ختارت الأكحل لون و ما اغطيها كان علم بلادها !!    

حكايتها حكاية و روايتها رواية

نا حليمة ، بنت الهنشير و الجبل والشهيلي
أني حليمة بنت البحر و الرمل و الهواء الحنين
أنا حليمة بنت المدينة و الجوجمة و السينما
حليمة كانت حكاية كبروا عليها الصغار
بنتلكم ثورية ، قوية ، متحدية الاستعمار
أما حليمة هي بنية تونسية ، حنينة ، رقيقة تخاف من النسمة وفي قلبها حب كبير ، حب للدنيا و للضوء
حليمة رواتلنا حكايتها وحكات وقفتها قدام الفرنساوي ، كيف كانت تهز السلاح للفلاقة في شونها !!
أما حليمة عمرها لا ماتت !! ممشتش مع الكتب وتنست
حليمة كبرت في صدر كل طفلة تونسية اختارت  الحرية وكرهت الاستعمار
سألوها وقلولها : " إستعمار ؟؟ مو مش مع فرنسيس !! "
قمتلهم أمل وجوبتهم :" لا ممشاش ، مازال عايش بنتنا !! جابوه ولادها مرة هذي و سموه قطر "
ماهي الوجوه تفرق أما الحكاية هي هي ، حكاية بلاد طمعوا فيها ملاين
مساكن تمنوها تحت السباط أما مدام حليمة و أمل موجودين بش تقعد ديما  الحرية مشروع كل تونسية ، تخبي السلاح والثورة في شونها وفي قلبها
أمل بش تكبر كيفما كبرت حليمة وبش تجيب بنية تسميها أماني وبش تعلمها إلي الثورة حب لامتناهي وإلي حب البلاد مرض ما يرتاح منو كن إلي مدفون تحت تراب ويقعد القبر يحمل في نقشتو قصة حببلاد  إلي مهما طال الدهر بش اجيها نهار وتغلب لاستعمار   

vendredi 14 décembre 2012

امسح دموعك وقوملهم !!


امسح دموعك !! يزي ما بكيت 
عينيك حمر ، وجهك أصفر مفجوع 
شربحت منو لبكا ؟؟ كان الغبنة 
قوم يزي !! امسح دموعك ، فيق على روحك !! 
أقف!!! لوح عليك اللون لكحل  و أقف!!
أقف يلي بدين والكذب دفنوك
أقف يلي بالقهر والحزن عذبوك
يزي مل الخوف وألبس هاك الروبة الحمرا ، روبة العز والكرامة ماهي ولادك بدمهم لونها 
البسها وتزين بها !! 
اغسل وجهك، كاحل عينيك ، عينيك ذبلة ، عينيك إلي بالرش نقبها ، عينيك إلي بغاز حرقوها !! 
فيق !! قوم !! وقولهم إلي إنت قضية صحيح كنت منسية أما من اليوم لا الظلم والكذب عندهم معك بلاص !!
ما تسكتش !! و أقسملهم بدم الجريح الحر !! إحلفلهم بدمع أم الشهيد الغالي ؛ إلي مدام القلب حي بش تبصلهم كي شوكة فالحلق !!
هما عشقوا الاستعمار وإنت حبيبك فداك بروحو و عمرو !! خلالك الحرية مذهب و الصمود دين !!
يزتشي توا من لبكا ؟؟ قوم وراهم قوتك !! 
أضحك يزيك ما بكيت !! وراهم هبلتك وشيختك !! 
أضحك وعلمهم إلي مدام حبك يجري في عروق ولادك باش يبقى مشروعهم حلما ، حلمة اليتيم إلي يحلم باش ارى امو !! 
يزيك ما بكيت امسح دموعك وقوملهم !!
إنت الدولة ، إنت تونس ، إنت حبيبة الحرية !!!!  

mercredi 23 mai 2012




الكاف ، غصة فالقلب مدفونة !! 

الكاف ، هاك لمدينة العالية ، مزيانة وحنينة تعرفت بنسماتها وضحكتها ، تعرفت بخفة دمها وجوها !! مدينة حلوة ، كبرنا فيها ، مشينا ولعبنا فيها !! مدينتنا ، كافنا لعزيز ، تربينا فيه ، ضحكنا وحبينا فيه !! حلمنا فيها وتمنينا تلمنا في كبرنا و درجحنا حتى لنهار لحساب !! أما خسارة مدينتي من حبها لينا ،دزتنا  من صغرنا ، خرجتنا ، سحتتنا ، كيف طير ، نجنحوا بعيد أما حبك ديمة مزروع فالقلب ، نتفكروها كيف الغصة ، تخنقنا ، تبكينا ذكرتها !! 
مدينتي علمتنا ، نمشو ونطيحو ، ندعثرو، أما نقومو ونكملو ثنية !! مدينتي بصعدها ، علمتنا نخزرو للعلي ، مانوتش راسنا كان الرب العالمين !! مسكينة بلادي ، مقهورة منسية معفوسة !! ضلمه من نهر إلي قالوا إستقلال !! هي ساعة  كانت تفرح بضيف كيف اجها ، تحل ايدها وتضم الصدرها لحنين  !!
يا مدينتي ، قدش تحملت ضلم هى سنين ، صبرت و ستنت نهار افرج فيه ربي علينا وعليها وترجع أيام زهونا وفرحنا ، نرجعوا لأيامتنا ، قاعدة حلوة تحت توتة بومخلوف وكاس تي ب300 افرحنا ويروينا وكيف اجي نهار كواحد منا اهز روحو ويمشي يقصد ربي لخدمة ، يسترزق منها وبها إجبلك حويجة إفحك بها ، هو مرة فيلم جديد ولا مسرحية ولا حتى معزوفة تطرب بها وتشطح زناقك عليها !! أما خسارة ، بلد الخير والخمير مظلومة ومحرومة !! 
يا بلادي ، مشت أيام وجت أيام ، قامت  لبلاد وعيطة تونس الكل مل سرقة ونهبة متاع كمشة كلاب!! نهرتها بكيت ، فرحت قلت كهو بش نعرس للكاف ونفرح بيه، نشوفو زاهي ، شايخ بين المشاريع  والمناجم وطرقات جديدة !! 
يا كافي الغالي، قلت بالك يتفكروا النت أصل الثقافة ، و يبعثوا فيك جامعة جديدة ولا ثنين ، تخلي بها ولادك قراب لك ، تحمهم من شر الغربة والبعد !! قلت بالك احلو فيك مصنع ولا ثنين اخدموا فيك حبابك إلي قعدت لقهاوي والخمارات نستهم علمهم و حتى شدان ستيلو ، لبطالة لحستلهم مخاخهم ونستهم هاك الحلمات إلي كانوا سنين لتالي يسرحو فيهم !! 
يا مدينتي ، تمنيتك للا ، ملقصبة، تخزر لماليك يخدموا ، ويضحكوا مستنفعين بغناك ، يخلق  من أرضك جنة افرح بها لصرب والبعد ، يا مدينتي تمنيتك للا حتى ساق ع ساق ، تصول وتجول تدلل برزقك بين جهات وتندي للفقر والمحتاج تفرح بخدمة ورزق بسيطة ، تخليه اعيش كيف لعباد ، ويستكثر خيرك ويقول هذيك أرض جود والإكرام !!
أما خسارة ، لقلب أتى ضحكة عليك حرمة ، كيف قسموا ، نسو بايك، تلفوك وقالوا هذيك بلد من غير امالي، كيف لتيمة فكلك حقك وتعدوا وعتق بضهر !!